إزاي نختار النظارة الطبية

إزاي إننا نختار النظارة الطبية بشكل صح، علشان لما نلبسها تحافظ على نظرنا وكمان تدينا شكل حلو.. وبكده نكون ضربنا عصفورين بحجر واحد..
وعلشان نحقق كل الحاجات دي يبقى لازم نعمل الكلام اللي هقولكم عليه دلوقتي..

لازم كشف نظارة مضبوط
إزاي نختار النظارة الطبية Kamar_01

علشان فعلا نقدر نختار النظارة المناسبة يبقى لازم في الأول نعمل زيارة لدكتور عيون نكون عارفين إنه شاطر ونعمل عنده كشف نظارة لأن الكشف ده هو اللي هيحدد لنا مقاس النظارة المناسب لعنينا، وبعد كده ناخد المقاس ده ونروح لمحل النظارات وندي إخصائي البصريات الكشف ونطلب منه يعمل لنا نظارة مناسبة ونبدأ في اختيار الشنبر والعدسات المناسبة..

نختار شنبر مناسب

واحنا بنختار شنبر النظارة لازم نكون عارفين إن "لكل وجه شنبر محدد مناسب" وعلشان نقدر نحدد الشنبر المناسب لوجهنا يبقى أول ما نروح محل النظارات نقيس أكتر من شنبر ونبص في المرايا ونشوف إذا كان الشنبر فعلا مناسب لوجهنا ولا لأ؟!
وبصفة عامة هنلاقي إن:
"الوجه الطويل" يناسبه نظارة لها شنبر عريض، أما إذا كان "الوجه مستدير" فإنه يناسبه شنبر ذو زاويتين بارزتين للخارج أو مربع الجوانب، لكن "الوجه اللي على شكل قلب" فده يناسبه شنبر ضيق غير منفرج الذراعين.. أما "الوجه البيضاوي" فده كل أشكال الشنابر مناسبة له..

وعلى فكرة المفروض إن حجم الشنبر يكون زي حجم الوجه فلو كان مثلا الوجه ضخم وكبير يبقى نختار للنظارة شنبر كبير والعكس صحيح، وده لأن التناسب بين حجم النظارة والوجه بيدي جمال للوجه.

ودي كمان شوية حاجات ناخد بالنا منها واحنا بنقيس الشنبر :-
1- إن الشنبر يكون صغيرا نسبيا وثابتا على الوجه مش متحرك علشان النظارة ماتقعش مننا بسرعة.
2- إن مركز العدسة اللي بيتم تركيبها في الشنبر يكون أمام مركز حدقة العين (النن).
3- إن طول ذراع الشنبر يكون مناسب وترتكز زاويته على الأذن بدون ما تسبب ضغط عليها علشان ماتكنش السبب في الإصابة بالتهابات على جانبي الوجه والأذن.

للشنبر ألوان وخامات متعددة
إزاي نختار النظارة الطبية Kamar_02

دلوقتي بقى فيه شنابر بألوان متعددة، واختيار لون الشنبر بيتوقف على حسب لون بشرة كل واحد، وبصفة عامة البشرة الغامقة هتلاقي إن الشنابر اللي ألوانها صارخة زي "الأحمر" و"البرتقالي" و"الأخضر" و"النبيتي" هي المناسبة لكن البشرة الفاتحة هتلاقي إن الألوان المناسبة ليها "الأسود" و"الرمادي" و"الأخضر" أما البشرة القمحية ودي الأكتر انتشارا فكل الألوان بتليق عليها.
ويا ريت لو سننا صغير نبعد عن الشنبر الذهبي لأن اللون ده بيدينا إحساس بإن شكلنا أكبر من سننا فعلا.
وعلى فكرة اختيار خامة شنبر النظارة بتتوقف على حسب مزاجنا وإمكانياتنا المادية ففيه "البلاستيك" وده بيتميز بخفة وزنه وإنه أقل عرضة للكسر، وفيه منه أشكال وألوان متعددة وفيه "الإستانلس ستيل" وده يتميز بخفة الوزن أيضاً وإنه غير قابل للصدأ.

العدسات نوعان
إزاي نختار النظارة الطبية Kamar_03

العدسات نوعان... إما تكون من "البلاستيك" ودي بتكون خفيفة الوزن وغير قابلة للكسر بسرعة ودي بتكون أحسن للأطفال الصغيرين اللي نظرهم ضعيف لأنها بتكون خفيفة على وجوههم وبتخلي الطفل يحب النظارة.. أو إنها تكون من "الزجاج" ودي عيبها إنها سريعة الكسر، ويا ريت نختار الزجاج الملون لأن ده بيدي شكل أحلى.

دعامات النظارة
إزاي نختار النظارة الطبية Kamar_07